MÖVLUD AĞAMMƏDİN ŞEİRLƏRİ

DƏRİN
Deyirlər, dərdlinin dərmanı dərddi,
Dərdin dərd dəryası dərindən dərin.
Dərddən dərd dərirlər dərd dərəsində,
Dərdin dərd dəryası dərindən dərin.
* * *
Dumandan dərd alır dağın damənin¹.
Dolanır dərdimin dağında mənim.
Düşürün dərdimin dağından məni,
Dərdin dərd dəryası dərindın dərin.
* * *
Dərd dərdə dərd dilər düşünsən dərin,
Dərd dərmək diləsən, dər indən², dərin.
Dünya, dərdin dolu deyildir dərin³,
Dərdin dərd dəryası dərindən dərin.
* * *
Dərd damır damından, dünya dərdlidir,
Damır damla-damla, dərya dərdlidir.
Dərd dağda dağlanır, dərdi dərd didir,
Dərdin dərd dəryası dərindən dərin.
1. ətək
2.indidən
3.qapı
30.12.2021. Quba-Zərdabi.

YUXULARIN ÇİN OLACAQ DEYİRDİN…
Yuxuların çin olacaq deyirdin,
Qovuşacıq bir təndə bir can kimi.
Tərs yozumun xatirinə gözlədik,
Ömür bitdi ” bir” deyilən an kimi.
* * *
Kimdən umaq bir ömürlük səadət,
Umduğumuz sayılacaq qəbahət.
Qınayacaq bizi bu el, bu adət,
Ürək qəmdən dəlik-dəlik, şan kimi.
* * *
Taleyimiz pərən-pərən, didərgin,
Sevgim üçün nələr, nələr edərdim.
Bu dünyanın bu üzündən gedərdim,
O üzündə mövludum ad-san kimi.
29.01.2022. Quba-Zərdabi.